Kum
zabi 15 vel ahkhan Gremany ram, Nuremberg timi khawte pakhat ah nauhak 18 nei innsang
pakhat a rak um. Innsang pabik ih hnatuan mi hi sui sodeng (goldsmith) a siih fale
18 hrangah nikhat ah nazi 18 sung zikte lai hna a tuan a tul theu. Sum lut dang
ngah bet dingin a inn kiangkap fialmi pawl khal a tuan phah theu.
An
dinhmun hi sia zet hman sehla, upa bik pahnih cun Nuremberg khua ih tlawngah
zuksuai lam (Artwork) zir thei dingin sunmang an man. An pahnih in zuksuai lam
hi an paih zawng zet a si, asinan an pa in tlawnginn ah a ret thei lo ding ti
cu an thei keukeu.
Zan
khat cu an sungkua zatei an itkhawm lai ah annih pahnih cu an tumtahmi an rel
rero, rei nawn an rel hnuah lungkimtlangnak thu an tuah. Pakaht in tlawng a kai
sungah pakhat in a cawm ding timi thu a si. Zo a kai hmaisa ding ti theih duh
ah paisa pia an khirh tum. Minung lu maw pangpar lam tlun ah a um timi an zoh
dingih a sungsung in kum 4 sung hmuahhmuah cawm ding a si. Cun a ongtu khal in
tlawng a theh hnu ah a pakhat sawntu kha a thla hlawh in maw asilole hna pakhat
tuan cawm ve ding a si.
Colhni
zing khawm an theh hnu ah paisa pia cu an khirh ih a nauta deuh, Albrecht Durer
timi in a neh ta riai. Albrecht cu Nuremberg ah Artwork lam kum li sung zir
dingin a feh. Cun a uu Albert khal an kiangnai ih leikhursuak (mine) hna tuan
dingin a feh ve. Albrecht cu a paih zetmi a zir ngah ruangah a thiam thei zetih
a kut suahmi zuk pawl tla cu a saya tam sawn pawl hnakih an that sawn ruangah
mipi in an duh zet. Tlawng a theh tik ahcun a tlawng fee zat lai paisa a ngah ve
man a si.
Mino
te Albrecht cu an khua a tlun tikah, a inn sungsang pawl in an rak hmuak ih a
zaan ah lawmnak puai an rak tuahsak. Sunglawi zetin an rak cawicang. Siangpahrang
vekin tonak tha zet ah an toter. Tawkfang cun Albrecht cu a tonak hmun ihsin a
tum ih kum 4 sung rak cawmtu/zohtu a nau Albert hnenah feh in sabit zu cu nuam
zetin an in tlang ih thunuam an rel tlang. A tongkam netabik cu, ka duhdawt
zetmi ka nau Albert, tu cun na caan a kim thlang a si. Tucun Nuremberg ah na
tumtahmi hlensuak dingin feh thlang aw, ka lo zoh tha ding tiah a ti.
An
zaten mangbang zetin Albert le Albrecht cu an zoh, Albert ih mitthli cu a tla ih a ikik ciamco.
A lu cu thing phah in a si lo….a si lo…..a si lo….timi tongfang cu dimten sal
phah in a tap rero.
A
netnak ah, Albert cu a tonak ihsin a dingih a vorhlam kut thawn a biang ih a
mitthli luang cu a hun hnul. A naupa ih hna kiangah dimte in, ‘a si lo, ka nau.
Nuremberg ahhin ka feh thei lo. A tlai tuk zo. Kum 4 sung leikhursuak ih hna ka
tuan ruangah ka kut pawl hi ziang an cang ti zoh aw! Ka kutzung hmuahhmuh hi voi
khat fingfing tal cu ka kiakter hai theh. Zuksuainak pen pawl tla cu kai thei
ding ka sin awn lo. Cun tu naite ah voihlam kut hi ka ilh ih khuatno hman ka
keng thitha thei ceu. Curuangah a cang thei lo, ka hrang khua a tlai zo ee ka
nau’ tiah a ti. Tu ah kum 450 tluk a rei zo. Asinan Albrecht ih zuk suaimi
zahnih lenglo cu leitlun museum hmun tin ah zoh theih in an tar a si. Mi tampi
cun office le inn khal ah an tar.
Albrecht
in a naupa ih duhdawtnak le a hrangih a hlanawknak hngilhlonak ah le upatnak ah
a Uu Albert ih zuk cu tha zetin a suai, zuk ahcun Albert ih hriamhma tuarnak
kutzung pawl an siih a hmel cu tlunlam a hoiter. A cui zuk cu “Kut” tiin a ko,
asinan a zuk suaithiamnak in leitlun mipi thinlung a la tukih cui “Kut” timi cu
amah upatnak ah tiin “Thlacam Mi Kut” tiin an thleng.
Zir
theimi: Tu cu mi ropi ih zuk lem tarmi na hmug asile zoh sal aw.
Thil pakhat khat na tuah tul tikah, zohman zohman in anmah ten an tuahsuak dah lo
ti hi thei ringring aw.
Source:
No comments:
Post a Comment