Nauhak Pa in Pathian A Tong

Nauhak Pa in Pathian A Tong

Nikhat cu nauhak pakhat Pathian tong duh zet a rak um. Pathian ih umnak hi a hlan zet ti a thei, asinan a thinlung ih duhnak vekin a thuamhnaw le a bag (suitcase) pawl cu phur in a poksuak. Peng khat hrawng a feh hnu ah, nutar pakhat a khat. Cui nupi nu cu pangpar hmuan sungah to in vate zam lai a zoh rero.   

Nauhak pa cu nupi nu kiangah to tahrat in a suitcase a ong. A suitcase sungih tithol cu la in tidai a in zik, nupi nu rilrawng zet ih um kha a hmuh tikah a tidai in ding a pek. Nupi nu cun lungawi zet le hni siamsi ten a cohlang. Nupi nu ih mithmai pan tei a um lai, a hnih siamsi lai kha mawi a ti tuk ih a hmu duh sal. Curuangah tidai le thil ei ding a pek lala. Nupi nu cun lunghmui zet le mithmai pan ten a hnihsan lala. Nauhak pa cu a lungawi tuk! Zaan lam pi tiang cunah an to tlang, an hnihsan aw, asinan kam khat hman an bia aw lo.

Khua a hung sim thlang tikah nauhak pa cun a bang zia kha a thei aw. Nauhak pa cu inn tlung dingin a timlam thlang. Hlapi a thlen hlan ah a kirsal ih nupi nu cu mangtha pe phah in a ra pom ta. A mawi thei bik le duhnung thei bikin a rak hnihsan lala. Nauhak pa cu a inn a thleng thlang, sangka a ong ih rei a to man hla ah, a nu in ‘tuini cu ziang na tuah, na va lungawi lawmam ve’ tin bangmang zet in a sut cih. Nauhak pa cun, ‘Pathian thawn suncaw kan ei tlang’ tiah a let. A nu in thudang a sut bet hlan ah, ‘anih tluk ih mithmai pam le hni mawi leitlun ah an um nawn lo ding’ timi a bet cih.

Cu lai ah nupi nu khal cu lungawi zet in a inn ah a tlung ve. Lungawi zet le hnangam zet mithmai thawn a tlun ve tikah a fapa te a mangbang zet. ‘Tuini cu ziang na tuah, na va lungawi lawmam ve’ tiah mangbang zet in a sut ve. A nu in, ‘tuini cu Pathian thawn thil kan ei tlang’ tiah a let ve. A fapa in thu dang a sut hlan ah, ka rin hnakin Pathian cu a rak nauhak zet’ tiah a sim bet cih ve.

Zir theimi: Pathian ih umpinak hi hmuntin ah a um. A umpinak le a um taktak a si ti midang in an nunnak rori ih an tep ngah theinak ding ahcun kan lungawinak le hnangamnak hi midang hnenah kan langter a tul a si. 

Source: Tell Me Stories My Mum