Ralkap
pakhat ih Thuanthu
Ralkap pakhat hi Vietnam ram ih ral an
do hnu ah inn lam tlung ding a si thlang. San Francisco ihsin a nulepa cu phone
in a bia. Ka nu le ka pa, inn ka ra tlung thlang ding, asinan lo dil duh mi
pakhat ka nei. Rualpi pakhat kan inn ah rak hruai ka duh ih a cang thei pei maw
a ti. Annih in, ‘aw a ngah tuk. Rak hruai aw, ka hmel tla ka hmu duh ee’ tiah
an ti.
Ka lo dil duh mi pakhat a um hrih,
raldonak ah a tuahmawh aw ih hliamhma thawn a um. A kut le a ke tla mi nih an
tuahmawh ngah ruangah kut khat lam le ke khat lam nei lo a si. Khui hman a feh
thei nawn lo ruangah kan inn ah keimah thawn um tlang dingin ka duh tiah a dil.
‘Sorry tuk, ka fa. Hmun dang ih a um
thei dan ding kan ngah tuah thei ko. Asinan kan inn ahcun cuvek mi cu a ngah lo
ding’ tiah an sawn sal.
A si lo, ka nulepa, ka hnen ah um dingin
ka duh ee tiah a ti.
‘Ka fa, ziangmi na sut himi hi na
theifiang lo a si’ tiah a pa in a let. Cuvek milai cu kan hrangih harsatnak in
petu men a si ding. Kan thuthu in nuam zetih nun theinak kan nei. Cuvek mi nih
kan innsang in ra hnaihnok ding cu a si thei lo tiah a sawn. Himi pa hi
theihhngilh in nangmah lawng inn ra tlung ko aw. Anih khal amah ten lamzin dang
a hmu mai ding a ti.
Cumi hnu cun an fapa in phone a thlak. A
thuhla an thei nawn lo. Ni rei lo te hnu ah, Francisco palik hnen ihsin a
nulepa in thu an dong. An fapa cu inn sangpi ihsin a tla ih a thi timi thu an
dong. Palik pawl cun amah tei that-aw dingah an zum.
Lusun a tongtu nulepa cu San Francisco
ah feh in an fapa ih ruak cu an zoh. An riah a si zet. Cun an fapa in ke pakhat
le kut pakhat lawng a nei ti kha an theisuak cih.
Zirh
theimi: Mi tampi cu himi thuanthu sungih nulepa vek kan
si. Mi mawi le mi tha cu kan duh awl zet. Asinan harsatnak in petu cu kan hua.
Mi farah, tuamhlawm tul le tawitai pawl cu kan hnen ihsin va tlan hlo aw tiah
kan ti mai theu. Asinan lungawi thlak zet a simi cu cuvek ih in ti siang lo tu
milai an rak um thotho. Kan phu lo le tling lo cingin anih cun in duhdawt ih a
inn sungsang sungih va um ve dingin in sawm. Curuangah
tui zan cu na itthat hlan te ah, midang kha an sinak vek cekci ih na cohlan
theinak dingah le miphun dang le hnamdang pi par khal ah theihthiamnak dik na neih
sinsin theinak dingah Pathian hennah cahnak dil aw.
Source: History for kids
No comments:
Post a Comment