Nu Ih Hlan-awknak

Nu Ih Hlan-awknak

Ka nu in mit pakhat lawng a nei. Dawr fate a tuah: Tiva le hmuan lakih a kho mi hanghnah/hangrah a la ih a zuar theu. Cutin kan hrangah sumpai a hawl. Cuvek hna a tuan ruangah ka ning a zakter theu. Ka hnak in do tukin ka thei ih ka nu hi ka hua.

Nikhat cu lailak tlawng ka kai laiah kan tlawng in zuamawknak (sports day) kan nei. Culai ah ka nu cu a ra. Ka nu cun ka hnak in do tuk. Anih ih rat tulnak a um lo ka tiih, ka met ih hmun dangah ka tlansan. A thaisun cu ka rualpi pawl in na nu in mitkhat lawng maw a nei tiin zawmtai nawn in in sut ciamco.

Ka nu hi hi leitlun ah um nawn lo sehla ka duh men. Ka nu ziangah mit khatlam tla na nei lo tiin hma ton in ka sut. Nang cun mi ih hnihsan ding men ah in tuah a si hi. Ziangah na thi men lo tiah ka ti.

Cuvek ih ka tong supso cu ka thin a nuam lem lo nan, khatlam ah ka di a riam zet ih aw-kam hrang thawn biak lawnglawng ka duh. Ka nu hin in thawi dah lo ruangah tla a si thei, asinan ka nu ih thinlung hi ka rak natter ti ka thei ban lo lawlaw.

Cuih zan cu ka tho ih coka ah tidai in dingin ka feh. Cunah cun ka nu cu dimten a rak tap rero a si. Ka zoh ih ka tlansan men. Tong sia zet ka rak tong ngah ruangah ka thinlung cu a nuam ve lo. Asinan, mit khat lawng nei ih tap rero ka nu cu ka hua thotho. Curuangah ka thinlung ten, ‘ca ka zuam dingih ka thlawhtling ding, farah ringring le mit khat lawng nei ih fanu si hi ka hua tuk’ tin ka ti aw rero.

Ca ka zuam zet. Ka nu cu ka tan ih Seoul khawpi ah tlawng ka va kai. Seoul University ahcun tlawng kai thei dingin caan tha ka ngah. Cule, pasal ka nei. Inn ka lei ih fate kan nei thlang. Tucun ka hlawhtling zetih ka hringnun khal a nuam zet thlang. Hitawk hmun hi ka duh zet, ziangahtile ka nu ka hngilh theinak hmun a si.

Kan nun a nuam deuhdeuh. Ni khat cu rin lo piin mi pakhat kan in ah a ra. Zo si a si ti ka zoh ciang ih mit khat lawng nei ka nu a rak si. Van khi ka parih rung tla vekin ka thei aw. Ka fale cun ka nu ih mit an tih ih an tap, an rak ciamco.

Zo si na si? Ka lo thei lo tiin ka ti hrim. Ziangah hinak nangmah thu tein na ra thei, ka fale in an lo tih, tlan zang aw tiin ka kawk ciamco! Ka nu cun, aw ka tipalh a si. Ka fehnak ding hmun ka palh pang a si tiin in let ih a fehcih. In thei nawn lo ah ka ruat ih ka thaw ka thawn thei hlunhlo. Ka nu hi ka nun sung ka ruat lo dingih a cawm khal ka cawm lo ding tiin ka thinlung ten ka tong.

Nikhat cu tlawngta hlun pawl tonawk-khawmnak kan nei ding timi sawmnak ca ka dong. Ka nupi cu, kan zung pawl picnic kan feh zik tin ka bum. Tonawk-khawmnak kan nei hnu ah, tlakrawh thawn sak mi inn fate ah ka feh. Cui hmun cu ka thinheng caan ih ka rak au-kio theunak hmun a si. Cunah ka nu cu lei parah a rak ril ka hmu. Asinan ka mitthli fawr khat hman a for lo. A kut ahcun cahnah cu a keng.

Hitin a ngan:

Ka fa duhtak, ka nung rei pam in ka thei aw. Seoul hi ra tlawn ka tum nawn lo. Asinan vei khatte ra lo tlawng sehla, a tamtuk na ti pei maw? Ka lo ngai tuk. Tlawngta pawl tonawk-khawmnak ah na ra thei ti ka thei ih ka lungawi zet. Nan tlawngah ra lo ding thu ka botcat. Na hrangah hin mit pakhat lawng ka nei hi poi ka ti zet a si. Na thinlung ka lo tibuai, ka lo hnaihnok theu tla hi poi ka ti tuk. Asinan maw hihi ngai aw, nauhak te na si lai ah na tuahmawh aw ih na mit na kuaiter. Na nu ka si vekin, ka fapa te mit lo ih a hung thanglian ding cu ka hmuh thei lo ruangah ka mit khatlam hi ka lo hlu. Lei khawvel hi fiangzet ih na hmuh sal thei ruangah ka lung a awi tuk. Ka parih na tuahmi ruangah thinnatnak zianghman ka nei lo. Ka parih na thinheng can khalah, in duhdawt ruangah tiin ka la men. Na nauhak te lai ih ka kiangih na lek rero, na tlan rero lai kha ka ngai tuk. Ka lo ngai tuk a si ka fa! Ka lo duh tuk. Ka ziangkim na si.

Ka nu ih cangan mi ka hmuh cun, ka khawvel hi a hnin theh. Ka hrangih a nunnak rak hlantu maw si ka rak huat rero. Ka siraw tuk ih lungkuai in ka tap, ka nu, in ngai thiam aw tiin ka tap. Ka nu parih ka tongmi le ka tuahmi pawl hi ziangti zawng khalin lakkir le lehrul a theih nawn fawn si lo.  

Zir theimi: Mi pakhat khat kha an taksa kimlonak le an tlinlonak ruangah hua hrimhrim hlah. Na nulepa kha upat lo in um pang hlah. An hlanawknak khal thei lo le ziang siar lo in um hlah. Nunnak in pe ih tlun ah kan hrangah an nun an hlan. Lamzin dik in hmuh ringring ih thazang in pe ringirng fawn. Nulepa cun an fale hrangah ziangkim an can ngam, an fale ih ti sualmi hmuahhmuah an ngaithiam. An fale hrangih an tuahmi le an duhdawtnak hi ziangtik hman ah sam theih ding a si lo. Kan ti theimi umsun cu an tulmi bawm, duhdawt le upat hi a si.

Source: A Mothers Sacrifice