Midang ih Tuanbangnak Theihsak Aw

Midang ih Tuanbangnak Theihsak

Nauhak cathiam zet pakhat in company pakhat ah manager (hotu pakhat) hna a dil. Thusuhnak pakhatnak cu a ong. Company ih thuneitu, hotu lu bik in neta bik interview a tuah, neta bik thu ti tluknak khal a tuah cih. Thusuhnak a tuahnak ihsin nauhak pa hi cathiam zet, phuhra khal hmat tha zet thawn ong, cun phun hleihnih khal Distinct thawn ong, thiambik sinak rak ngah ringring theutu a si kha a theisuak.

Hotu pa cun, ‘tlawng na kai laiah tlawng ihsin bomnak (scholarship) na ngah dah maw’ tiah a sut, nauhak pa cun ngah dah lo a ti. Na pa maw si lo cawm tiah a sut sal. Nauhak pa cun, kum khat ka si lai ah ka pa nih mual in liamsan zo. Ka nu si in cawm/zohtu cu. Na nu in ziangmi hna a tuan? tiah a sut vivo. Nauhak pa cun, ‘ka nu hi mi ih hnapuan sawp in a hlawh aw theu’ tiah a let. Hotu pa cun, na kut in hmuh aw a ti ih nauhak pa cun a hmuh. Nauhak pa ih kut cu a nonal zet. Hmaphe pakhat te khal a um lo.

Hotu pa cun, na nu ih hnatuan hi vei khat tal na bom dah maw? tiah a sut. Nauhak pa cun, ‘bom dah lo lawlaw. Ka nu in ca ka zoh le ca tampi ka siar ding lawng hi in duh sak. Hna dang tuan in siang lo. Cun ka nu hi kei hnakin hnipuan sawp a thiam ih a rang zet fawn’ tiah a ti.

Hotu pa in, thil lo dil duh mi pakhat ka nei. Tuini inn na tlun veten na nu ih kut va kholhsak aw la, thaizing ah in ra tong sal aw tiah a ti.

Nauhak pa cun ‘hantuan ka dil mi cu ka va ngah hmel lo em’ tiah a thinlung ten a ruat. Inn a tlun veten, a nu ih kut cu kholhsak dingin a dil cih. A nu a mangbang zet, khat lam ah a lungawi phah fawn. A kut cu lungawi ten a san. Nuahap pa cun a nu ih kut cu nuam teten a kholh thok veten a mitthli a fawr thok cih. Tuini hi a nu’i kut a kholhsak hmaisabik ni a siih a nu ih kut zaphak pem le hmasi pawl kha tuini lawngah a hmu. Tidai thawn a kholhsak tikah a nu in na a ti zet, ziangahtile a zuk zakhak cu hmasi le hmahnai hlir in a khat.

Nauhak pa cun ‘himi ka nu ih kut hma le pem in ka hnipuan hmuahhmuah a tifai ih ka tlawng kainak paisa pe’ tiah a theifiang. A nu ih kut a khoh theh tikah, a nu ih hnipuan khal a zaten a kholsak theh. Cui zan cu an nufa in zan sim tiang thu nuam an rel tlang. A thaizing a rung kim ih nauhak pa cu a interview-nak ah a feh sal.

Hotu pa cun nauhak pa ih mitthli fawr kha a theithiam cih mai. Mizan ah ziangmi na tuah ih ziangmi na zir ngah in sim thei pei maw? tiah a sut. Nauhak pa cun, ‘ka nu ih kut ka khohsak, a hnipuan khal a zaten ka sawpsak theh’ tiah a let.

Hotu pa cun, na tuar dan in sim aw a ti. Nauhak pa cun, “pakhatnak ah tucun midang tuanbangnak ih hlut zia ka zir ngah. Ka nu um lo sehla, tuini ah hivek ka si thei zik lo. Pahnihnak ah, ka nu ka bomnak le hna kan tuan tlangnak thawn thil pakhat khat hi tuansuak a har zia ka zir ngah. Pathumnak ah, inn sungsang ih thupit dan le man khun zia ka zir suak a si” tiah a sawn. 

Hotu pa in, “ka company ih hotu pakhat si dingah hivek lungput nei mi hi tui hlan ihsin ka hawl ringring mi a si. Midang ih hnatuan bangnak theihsaktu, thil pakhat khat tuahsuaknak ding hrangah midang ih tuanbangnak rak lawm thiamtu, le a hringnun ah paisa lawng hi thupi bik ih ret lotu milai hi ka tul mi le ka hawl mi a si. Zangfahten ka company ah hna ra tuan hram aw” tiah a ti. Himi nauhak pa cu hnatuan a taima zet, midang ih upat khal a hlawh. A company ih hnatuantu hmuahhmuah cu tangrual ten hna an tuan tlang ih hmuh theih rori in a hlawhtling zutzo.

Zir theimi: Mi pakhat in harsatnak le hmuhtonmi a nei lo ahcun, midang in a hrangih an tuanbangnak hi theihthiam lohli, le rak lungawi thiam hi a har zet. A thupi bik cu hringnun ah harsatnak tep ve in, an hrangah harsa zetih hna a rak tuantu pawl kha cing ringring in, an tuan bangnak pawl man neihter ding hi a si. 

Source: Ancient Stories