San
Isidro ah inn tumpi nei, rualpi lian zet Jack timi ka nei. A inn khan pakhat cu
keimah ih hnatuannak (NGO) zung ih hmang dingah in
san. Kan hnatuan mi ih tumtah mi pakhat cu mi harsa luar deuh le khawte lam
pawl a tul dan ih zirin bawm le tanpi a si.
Vei
khat cu mipi hmai ah hmel theihternak in nei. Cutawk ih a tong mi pakhat cu ziangruangah
ka rualpa Robert hi ka inn ka san timi ka lo sim duh a ti. A sim duhmi sim
hngal loin, nauhak pa ih thuanthu a sim ta. Nauhak pa ih thuanthu cu a tanglam
vekin a si. Nauhak pa cu rang kiltu ih fapa a si ih a pa ih hnatuan bik cu ram
lak ih ral khalh, sawr le hmun tinkim ih khualtlang rero hi a si. Inn le lo
thitha khal a nei lo. A pa ih dinhmun cu cuvek a si ruangah a fapa ih fimzirnak
lam tiang a siatsuah theh. Lailak lawng (middle school) a kai laiah hmailam ih a
tumtah mi le a tuan duhmi pawl ngan dingmi a saya pa in nauhak pa cu a fial.
Cui zan cu cahmai hleisarih sungah a tuhtah
mi cu cipciar zetin a ngan. Nauhak pa ih tumtah mi cu ram acre 200 hrawng nei
ih inn tumpi pi 4000 tlun sang le sau sak ding, hmun kaupi nei ih ramsa a
phunphun vulh ding, ramsa hrangah pi 2000 tluk sang le sau inn sak ding a si. A
cahmai ahcun a inn um dan ding, ram sa umnak ding le hnatuan tu pawl ih umnak
ding pawl khal a suai theh.
A tuhtah mi hi a thinlung sungah a cam
zet, a thaisun cu a saya pa hnenah a hei ap. Nihnih hnu ah a ca nganmi cu a
ngah sal. A ca hmailam ahcun pen tisen thawn nganmi F tummi a hmu, cui tlunah ‘class
theh ah in tong aw’ timi tongfang a hmu bet.
Nauhak pa cu a tumtah mi a thinlung te ih
ruat phah thawn saya pa hnenah a feh ih ‘ziangah so F kha ka ngah?’ tiah a sut.
Saypa pa cun, ‘hivek tumtah mi hi nangvek
nauhak hrangih a cang thei lo mi a si. Paisa le na nei lo. Na pa le rang sawr
menmen a si. Na tul mi pawl lo bawmtu dingah hlawnthil le ri neihmi zianghman na
nei fawn lo. Na duhmi vek inn tumpi nei dingah paisa tampi a tul. Lo ram na lei
a tul, na sak a tul bet. Na vulh dingmi ramsa pawl hrangah a zin na tul bet.
Acozah hnenah siah na bet a tul bet ding. Na thlensuak dan ding lamzin hi a um
in a lo lawlaw’ tiah a ti. A saya pa cun hitin a sim bet, ‘ka fa, ka simmi hi
ngai, na tumtah mi hi a dang deuh va ngan aw la, in rak ap sal aw, cuti ih na
tuah le F ka lo pe lo ding (ka lo sungter lo ding)’ tiah a ti. Zarh khat hnu ah
nauhak pa cun a paper cu a pa sal, asinan zianghman thleng danglam mi a nei
cuang lo.
A paper ahcun “ F (Sung cazin) ah in ret
aw, kei in ka sunmang hi ka ret tha ve ding’ tiah a ti.
Jack in himi thuanthu a sim theh dingah ‘himi
thuanthu ka lo sim duhnak san cu pi 4000 tluk sang le kau keimah ih inn pi
sungah tu ah nan to rero ruangah a si. Tlawngta ka si lai ih ka sunmang pawl tu
ah a kim zo. Tlangta ka si lai ih ka inn pungsang um dan ding ka rak suaimi
paper tla tu ah ka nei lai. Manhla hleice cuang ka ti zetmi cu tlawngpih can ah
ka saya hlun (na sungman hi ziangtik hman ih a kim thei dah lo dingmi a si in titu
saya) in a tlawngta 30 lai rual thawn thal sung cazir nak dingah kan inn khan an
ra sang theu’ tiah a ti. Saya hlun in a inn a suah zawngah, ‘Jack, himi thu hi
tu ah ka lo sim duh a si. Na saya ka rak si lai ah nauhak tampi ih sunmang firtu
ka rak si. Asinan nang cu vanthat hlak zetin, na tumtah mi parah beidong mai lo
dingin ruahnak le fimnak thatha tampi na rak nei ee’ tiah a ti.
Zir
theimi:
Na sunmang hi zohman firter hlah, kilhim aw. Na tumtah mi hlensuah
dingin zuam tento aw. Hlensuah thei lo ding khop in a tum lo. Hlensuak dingah a
tenau tuk ti khal a um cuang lo. Zokhal in a sunmang kimter ding ahcun ziangvek
caan khalah dungsip mai lo le beidong mai lo ih a zuam tento a tul theu a si.
No comments:
Post a Comment