Veikhat cu mawtaw thawn accident tong ruangih kut kehlam nei lo nauhak kum 10 mi timi a rak um, nikhat cu a kut kehlam kiak cingin Judo
Japan mi kuat thiam tak pakhat (Judo Master) hnenah cun kuat zir cu a thok. A zirnak cu a tluang zet ko. Asinan a theihthiam thei lo mi thil pakhat a um. Cucu thla thum sung a zir hnu khalah a sayapa in a kel lawnglawng a zirpi mi a si. Nikhat cu nauhak pa in a sayapa cu "zirnak phun dangdang tla ka zir thlang lo ding maw?" tiah thu a sut. A saya pa cun "himi phun khat lawng hi na theih mi a si, na san sung khalah himi lawng hi na tul dingmi a si" tiah.
Nauhak pa cun a sayapa ih sim duhsan mi cu a theithiam lem lo, asinan a cohlang ih zirnak cu a peh vivo. Thla tampi a rei hnu ah, a sayapa cun nauhak pa cu Karate zuamawknak hmun ah a hruai. Cui zuamawknah ahcun a tel ve. Puai hnih cu awl-aiten a pehpeh in a neh mai. Nauhak pa cu a mangbang zet. A puai thumnak lut ding a si. A puai thumnak cu har deuh ding a bang nain, rei deuh an hun doawk cun a do mi pa cu a caurau ih nauhak pa cun a kuat zirmi phun khat lawng cun mi a neh rero men. Final a kai ta riai.
Final ih a ton dingmi pa hi midang aicun a tum deuh, a cak deuh, hivek lam ih hmuhton mi nei zet khal a si. An hun do aw ih, nauhak pa cu cun lam a pam deuh. Nauhak pa cu a kut kehlam tha lo cia thawn a khawng aw na deuhdeuh kei ti phangah Referee in puai titawp a tum. Asinan nauhak pa ih sayapa cun puai cem tiang lek lawlaw hai ko seh tiah a dil. Puai an thok sal minute rei lo te ah nauhak pa ih do mi pa cu amahten a ti aw sual pangih nauhak pa cun a thong ril ih cutin nehnak a co. A do mi pawl a neh theh ruangah cakbik sinak (champion) a ngah ta riai.
A sayapa thawn inn ah an tlung, zuamawknak puai cu zohsalnak an nei. Nauhak pa in "sayapa ziangtin saw ka champion thei a va mak ve" tiah a sut. Anih in hitin a sang, 'a san cu, na zirmi pakhat te kha nal zet le thiam zet ih na zir suak ruangah a si. Cun, na kut kehlam kiak kha lo kaihsak thei lo dingih na humhim thiam ruangah a si' tiah a ti.
Nauhak pa ih cahlonak/ tlinlonak cu a cahnak ah a cang riangri a si.
Zir theimi:
Vei tampi cu cahlonak/ tlinlonak tivek kan neih tiah Pathian kan puhmawh, dinhmun in a zir lo tiah kan ti, asilole thanaunak ah kan hmang theu. Asinan cuvek in ruat hlah uh si! Kan cahlonak/ tlinlonak zawn hi in ti caktu ah a cang thei, kan cahnak bulhram pi ah a cang thei a si. Kan zaten kanmah le tawk zawnte in hleicenak kan nei theh ih kan thupi theh fawn. Curuangah cahlonak/ tlinlonak ka nei tiin tha nau in um hrimhrim hlah uh si.
No comments:
Post a Comment