Sabek le Cumkheng Tlanzuam Aw

Sabek le Cumkheng Tlanzuam Aw

Nikhat cu Cumkheng le Sabek hi tlan zuam aw ding an si. Sabek cun a tlancaknak hi rualpi dang parah a tluangkhawng zet. “ka duh tawk ih ka tlan ahcun, zo hman in tlan zuamawknak ah in neh hrih lo . Tu ah zo ha tlanzuam awknak ah in ngamtu um” tiin ro a suang.

Cumkheng cun dimten, “keimah in ka lo zuam ngam a si” a ti.

“In cepoh men maw si. Na kiang ah lam phah in ka lo zuam men ding, nang maimai” a ti.

Cumkheng cun, “khati khan nehmi na si hlan sung cu na cahnak kha hngalpi rero ko” a ti ih zuamawknak thok ding a cawm ve cih.

Zuamawknak cu an thok. Sabek cu cakzet le zamrang zetin a tlan ih cumkheng hman in a hmu ban ceu. Sabek in cumkheng cu zianghman siar lo vekin daihnem ah a colh huahhi san, a itthat san men. Culai ah cumkheng cun a hnatuan mi cu cawl lo in, a kel ten a tuan rero. A tlan kel ten a tlan rero. Sabek cu a itthatnak ihsin a hung thang tikah cumkheng cu a hmun a rak thleng zik thlang kha a si. Sabek cun a dawi man nawn lo.

Zir theimi: Nuamnai zet le cawl lo (punghman) in, a kel tei hnatuannak hin nehnak a co sawn theu.

Mi-Aa Pa, Brahmin

Mi-Aa Pa, Brahmin

Gangu timi pa hi Hindu biaknak ih an upat zetmi sinak pakhat neitu, Brahmin  a si. Anih hi mi daite a siih mi tluangtlam zet khal a si. Nikhat cu Gangu in mee pakhat a lei. A inn lam pan ih a tlun rero laiah thawnginn ihsin suakpek te misual pathum a tong.

A mee leimi cu zohsak an tum. An lakih misual pakhat in, “ziangah na liang parah uico na phur rero, a mawi lo tuk” tiah a ti. Gangu cun rei zet a ruat hnu ah a feh.

Lehhnu ah misual pakhat cu a tong lala ih, “ziangruangah natnak a nei mi uico cu na liang parah na suang” tiah a ti. Gangu cu a mangbang zet thlang.  Cuhnu ah misual pakhat in, “ziangruangah san a tlai lo mi uico cu na liang parah na phur” tiah a sut lala. Gangu cun a phurh mi kha mee a si lo ti a theifiang thlang ih a phurh mi cu zinthlang ah a thlon.

Zir theimi: Midang ih bumnak hmu thei/theithaim lo ding khop ih bengvar lo in um hlah.

Thin Sau Zetmi Nauhak Nute

Thin Sau Zetmi Nauhak Nute

Veikhat cu ram pakhat ah pam a tlung. Cui khawpi sung ih nauhak hmuahhmuah cu milian pa ih inn ah sang la dingin an feh theu.

Hnen-um pawl in sang an rak kensuak veten nauhak pawl cu anmah le anmah kha sang cuh aw in an sual aw ciamco theu. Nauhak nute pakhat cu sualawknak ah a tel ve dah lo. Amai caan kim ding kha thinsau ten a hngak theu ih sang fate bik a ngah theu.

Nikhat cu nidang vekin sang fate bik a congah lala ih inn ah a tlunpi. A phel tikah paisa dollar fanghnih a hmu. Cui paisa cu pesal dingin milian pa ih inn ahcun a fehcih.

Milian pa cu nauhak nute ih dingfelnak parah a lungawi zet. Cui dollar 2 lawng si loin, a let hnih ih tam in laksawng a pek bet.

Zir theimi: Thinsaunak in laksawng a nei ih a caan te ah cui laksawng cu a hrilsuak theu a si.  

Cawhnawi Zuar Pacang Pakhat

Cawhnawi Zuar Pacang Pakhat

Pacang pakhat hi cawhnawi zuar in pum a cawm. Nikhat cu cawhnawi kha zuar dingin khawsung ah a feh. A feh rero lai ah thu ruahmi tamzet a nei. Cawhnawi ka zuar mi thawn arfa keuh pek te khi tampi ka lei dingih ar tampi ka vulh ding tiah a ti.

Cun dawr ah feh in hnipuan tampi ka lei dingih mawi ten ka thuam aw ding. Khua sungih fala mawimawi ka hnenah ra in in nei aw in ti ding nan, ka rak duh lo ding, ka lu ka rak thingsan hai men ding tiah a ti aw.

Cu tiih ruahnak siava a neih rero lai ah a lu cu a thing ngaingai, a lu parih a cawhnawi ken mi kha a theihhngilh ih lei par ah a ti tlak. A cawhnawi pawl cu an bung theh ih  a khawkhan mi cu thulolak, zianghman lo ah a cang.

Zir theimi: Na arfa pawl kha an nun that hlan ahcun ziangzat a si ti siar hrih hlah.  

Siangpahrang Bruce le Maimom

Siangpahrang Bruce le Maimom

Scotland ram ah siangpahrang pakhat a rak um. A hmin cu Robert Bruce a si. Ral tampi a do ih a neh theh hai. Asinan voikhat cu  a sung neknek.

A nunnak him dingin ral donak ihsin a tlanhlo. Deuthlam pakhat ah a relh ih cunah khua a sa. Riahsiatnak le vanduainak a ton ruangah ruahnaksan a neimi pawl tla kha an hlo theh.  

Asinan nikhat cu a umnak thlam sungah maimom pakhat a hmu. Cui maimom cu thlam tawhram ah feh in a inn saknak dingah thil fate te pawl hawl tummi a si. Voi tampi a bah, a tlun nan a thosal ih a netnak ah a innpi (maimom rangpi) cu a saksuak thei. Maimom rori hman voi tampi a bah, a tlu, a sung nan, a thosal ih a hnatuan mi a pehzom sal timi hin Bruce ih ruahnak a ti danglam theh.  

Himi hin siangpahrang Bruce ih thinlung a khoih zet. Maimom nunnak ihsin cahnak le thazang thar a ngah. Inn ah a tlung ih ral do sal dingin a ralkap pawl a kokhawm.

Tucu phurnak thar le thazang thar thawn ral a do tikah nehnak a co ih a ram mipi pawl cu ral kut ihsin zalen zetin a ret theh hai.   

Zir theimi: Zuam, zuam, zuam sal aw.