Kumkhua Sir-awknak

Kumkhua Sir-awknak

Khua pakhat ahhin inn le lo nei lo fala pakhat a um. Cui fala cun sunmang tampi a nei. Cui khua thotho ah fala pakhat, dinhmun tha zet nei le mi hlawhtling zet a rak um ve. Fala nu cun mipa pa cu a duh zet. Anih khal in nunau nu ih duhdawtnak cu a cohlang ve. Nunau nu in mipa pa cu a ziangkim vekin a ruat. Anih khal in a fala nu cu midang hmuahhmuah hnakin a zoh tha ih a thuhla khal mi hnakin a thei sawn. Tlangval pa in nunau ih thatnak ding a si ahcun ziangkim tuah a huam. Nunau nu khal in mipa pa ih lungawinak ding a si ahcun ziangkim tuah a huam ve.

Mipa pa cun a fala nu hi amah ten todelh aw in, cawm aw thei sehla a duh. Harsatnak tla hi amah rori in tong in pacang zet in amah ten a ke par ih a din thei ding hi a duhsak zet. Ziangahtile, ‘mipa pa ih parah thil pakhat khat a cangpang a si khalle, amah te in a nung thei ding. A ke parah a ding thei ding’ tiah a ruat. Mipa pa cun a fala nu cu a ke parih ding thei dingin a kaihruai rero, kawk a tul can khalah a kawk mai. A netnak ah a fala nu cu a tlawhtling vivo. Amah le a mawi si, mipa tampi in an zoh/ ngaihvek thawk thlang.

Caan a hung rei cun a hlawhtling deuhdeuh ih duh tawkin a hung khawsa thei thlang. Mipa pa cun nunau nu cu a kaihrui ringring vekin, thazang a pe, a bawm ringring. Asinan, nunau nu cun amah kaihruaitu a tlangval pa theihhngilh a duh thlang. Ruahnak a pekmi pawl khal ziangah a siar nawn lo. Amah ten thubawhcahnak a tuah thei tukin a thei aw thlang. Mipa pa khal than dang a tuan thok ve. Nunau nu in mipa pa ih thapeknak le kaihruainak pawl kha a theithiam lo lawlaw. Mipa pa thawn thu an el-aw ringring riangri. Ni khat cu hitin ca a kuat, “na thu ngai ringirng ding hi ka si lo, keimah te in thubawhcahnak tuah thei ka si. Ka hlawhtling tuk! Ka hrangih tha bik dingin thu ti tluknak ka tuah thei ko ve. In duh lo asile tlan hlo men aw. Duhtu mipa tampi ka nei ko” tiah a ti.

Mipa pa cu a tuar na zet. Nunau nu cu mi menmen, mi farah te a si lai ihsin ka rak duhdawt ih cuvek cun ziangtin a ruat thei tiah a ti aw. A hlawhtling theinak dingah le a ke parih a din theinak dingah ka kai hruai ih thazang ka pe. Asinan ziangah himi pawl hi a theithiam lo tiah a ning na zet. Hitin ca a kuat ve,

“Na hlawhtlinnak hi a nasa vivo ih ruangah, na hrangih ka neihmi ruahnak le duhsahnak hi na theithiam nawn lo si ding tiah ka zum. Nunau menmen na si lai ihsin, hlawhtlinnak le thiamnak zianghman na neih hlan ihsin ka lo duh zo. Ka tumtah mi cu nangmah lo zoh niam ding le lo thinhengter ding hi a si hrimhrim lo. Na ke parih na din thei ding hi a si sawn. Asinan, kum reipi kan umtlang hnu ah hlawhsamnak hi ka ngahmi umsun cu a si. Na hrangih ka neihmi lungthin le tumtahmi pawl hi theithiam ko dingin ka lo tuah thei lo. Na hrangih tha bik ding hi ka duhmi a si. Kei hnak in hlawngtlinnak nei deuhdeuh ding ka lo duhsak. Keimah vekin thil sual tuah lo dingin ka lo ngen. A suk a so ih ka lo kaihruai rero le ka lo kawh rero nak san kha na hrangih a tha bik ka lo duhsak ruangah a si. Na duhmi pohpoh hmu ding le congah dingin duhsaknak tampi ka lo hlan a si” tiin a ngan.

 Mipa pa cun annih pakhat hi congah aw rori dingin a ruat. Ziangahtile annih pahnih tluk ih nuam aw thei an um lo. Annih pahnih an umtlang hicun zo dang an ngai dah lo. Cutluk ih lungrual le thinlung thei aw an rak si. Asinan mipa pa cu a lungkuai tuk ruangah sim ding zianghman a thei nawn lo. Nunau nu cun mipa pa ih duhdawtnak le duhsaknak a theisuak nan a rak tlai tuk zo a si. Curuangah a nun sung sir-aw in a um.

Zir theimi: Nangmah a lo duhdawttu ngaingai lawngin lamzin dik ah a lo hruai, a cang ahcun a lo kawk phahphah ko ding. Ziangahtile na hrangih a tha bik kha a duh ruangah a si. Tuihlan ih na hringnun kha vun ruatsal aw. Zo ha cuvek ih lo ti tu um! Cuvek mi um lo sehla, tu ah hivek dinhmun na si thei pei maw? Amah na ngaihlonak thinlung kha hlonhlo thlang aw. Ziangahtile na hringnun ih thupi bik le mankhung bik pa kha na huat phah pang ding, na can phah pang ding.  

Source: Storie Books 1