Thihnak Ih In Then Hlan Tiang

Thihnak Ih In Then Hlan Tiang

Zankhat cu ka nupi in zanriah a tuah rero lai ah a kut ka laksak ih thu lo sim ding ka nei ka ti. A to ih rawl cu thawm lo ten a ei. A mithmai ka zoh tiah a riahsia zet. Hmakhat te ah ka tong ding hmuah an hlo theh. Asinan ziangmi ka ruat timi kha ka theiter duh. Ka sim duhmi thupi, “then-awk ka duh” timi cu nemten ka simsuak thlang.

Ka tongmi ruangah a thinheng lemlo a bang. Ziangruangah? timi thu in sut. A thu sut mi ka sawn bet nawn lo ruangah a thinheng ciamco. A kut ih a hum laimi a darhai te cu a hlon ih “mipa khal na si lo, na pa lo tuk aw” tin aw-kaam hrang zetin in vin ciamco. Cuih zan cu kan bia aw lo. A tap rero. Kan nupa karlak ah ziangmi a cang ti a thei duh zet. Asinan keikhal in a san hi tlamtling zet le diriam zet in ka simfiang thei lo; ka nupi hin ka thinlung a la thei nawn lo. Jane timi nunau dang ka duh ruangah a si bik mai.

Thinnuam lo zet le thiam-aw lo zet cing cun theh-awknak ding thu hitin ka suah: Kan then aw dingih kan nu in kan inn le lo, kan mawtaw le ka company ih 30%  a co ding tiin ca ka ngan. Cui ka ca nganmi cu a zoh ih a bawtthlek theh. Kum 10 lenglo ka umpi mi ka nupi cu midang pi vekin ka ruat thlang. Inn le lo ka pekmi, ka mawtaw le thil dangdang ka pekmi parah ka sir-aw zet. Asinan Jane ka duh zet ruangah ka la sal thei nawn fawn lo. A netnak ah, ka hmaiah ringpin a tap, cutin a um ding ti cu ka thei cia keukeu. Anih ih tap cu ka hrang ahcun luatnak pakhat vek a si. Tuihlan zarh ziangmaw zat ihsi then-aw ding tiih ka rak ruat thup rero mi cu a cang ngaingai thlang ding a bang.

A thaizan cu tlai zet ah inn ka tlung ih cabuai parah cahnah (paper) in rak tan. Cui zan cu Jane thawn kan vaknak ah ka bang tukih zanriah khal ka ei lo, itnak ah ka feh cih. Zan lai ah ka thangharh ih cui a ca nganmi cu cabuai parah a rak um lai. Zianghman ah ka siar lem lo ih zoh lo in ka itsan lala.

Zing a hung kim ih then-aw ding ka timi a lungkim thu in sim. Ka hnen ihsin zianghman lak duh le beisei mi a nei lo, asinan kan then-awk hlan thla khat duh ah ka theihter cia ding kha a duhmi a si. Hivek simcia a duhnak san cu kan fapa te kha camibuai nei thlang ding a si ruangah a thinlung harter ding le then-awknnak thu in a thinlung a buaiter a phang ruangah a si.      

Cui a dilmi cu ka lungkim ve zet. Dil betmi pakhat a nei hrih. Kan neihawk sun ih ka cawi dan kha ruatsal dingin in duh. Cun kan thenawk ding zarh/kar sung cu itnak ihsin a lenglam tiang nitin ka cawi ringring a duh. Ka then theinak ding a si ahcun tiin cui a dilmi khal cu ka lungkim pi thotho.

Jane cu ka nupi thawn kan then aw zik timi ka sim. Lungawi phah nawn le lau phah nawn in in hnihsan ciamco. Ziangkhal asile na nupi hin then-awknak cu a tap ngeingei ding a si tiah tongkam sia zetin in ti.

Ka nupi then ka duh hnu cu kan taksa hi kan dai aw nawn lo. Cutin kan then-awk ding zarh kan thlengthlang. Nitin ten innleng ih ka cawisuah can a kim thlang, itnak khan ihsin a leng ih ka vun cawisuak cu a hlan vek a si nawn lo, ziangkim hi a dang theh. Midang pi ka cawi vek khi bang. Kan neihawk sun ih ka cawi vek a si nawn lo nasa. Phurrit vekin ka thei thlang. Kan fapa cun dunglam ihsin za a rak beng rero, ka pa in ka nu a cawi thei a rak ti. A tongmi cun ka thinlung in khoih zet. Ka nupi cawi phah in inn sung le inn leng ka hlehka pi rero. A mit a sing ih dimten, “kan then-awk ding thu hi kan fapa theihter hlah maw” in ti. Ka nupi thaw hin kan then aw zo vekin ka thei ih ka thin vek a heng zik lamlam. Inn leng sangka pi kiangah ka thum. Hnatuan dingin bus cu a hngak. Keikhal ka zung ah mawtaw thawn ka feh.

Ni hnihnak a rungkim, kan pahnih in zalen zetin kan nung thlang. Ka tanghlum ahcun a rungbok lohli. A angki hrukmi rin te cu ka thei hmurhmo. Ka nupi hi caan reipi sung a mithmai le a taksa pawl ka rak zoh tha lo a si timi ka theisuak. A nauhak nawn lo ti khal ka theisuak. A hmai khal a nonal nawn lo, a sam khal a hnok biarbi. Kan neihawk hnu ah a taksa tampi a tla, siatnak tampi khal a thleng. A parah ziangmi thil tha lo ka tuahsual si pei aw tiin mangang zetin minute pakhat sung lai ka zoh.

A nili ni ah, ka cawi lala cu amah thawn kan pehzom-awknak rin te kha ka theisuak sal. Kum 10 sung lenglo a nunnak tiang in pe ngamtu nunau a si ti ka theisuak. Ni nganak le ni ruknak ni ah kan pehzom-awknak kha a thang vivo sal. Himi thu hi Jane ka sim lo. Ka cawi tik khalah nuam ka ti ih awl-tuk in ka thei thlang. Ka nitin nun in ticak sal.

Zing a hung kim ih a thuamhnaw hruk mi a thleng tum. Hnipuan dangdang a hruk san nan, a tawkciah pakhat hman a hmu lo. Ka thuamhnaw hi ka tlo theh tiah a ti. A tawl theh a si ti kha kei in ka theicih, awl-ai ten ka rak cawi theinak kha a tawl tuk rungah a rak si. Ka thinlung in khoih zet. A thinlung ah thinharnak le lungretheinak nasa ten a rak tuar. Keimah le keimah khal thei aw mumal lo in a hnen ka thleng ih a lu cu ka tham.

Culai ah kan fapa te a ra ih, Papa, tucu ka nu a leng ih na cawi caan a si thlang in ra ti. Anih hrang ahcun a pa in a nu a cawi timi kha a hringnun ah um lo thei lo ih a ruahmi pakhat a si. Kan nu cun kan fapa te cu a kut thawn ra aw a tiih napin a ra pom. Hmun dang ka zoh lohli, ziangahtile ka thinlung a thleng aw sal pang ding ti ka phang. Ka tanghlum ah kan nu cu ka pom, kan innsung ka helpi ciamco. A kut nemte in ka hngawg ah dimten in dai. Kei in a taksa cu napin ka pom, kan neihawk ni vekin ka theisal.

Asinan a zang tuk thlang ruangah ka thin a nuam lo zet. Ni neta bik ni ah ka pom lala, ka cawi thei ceu. Kan fapa cu tlawng a feh zo. Napin ka pom, kan  nupa karlak ih naih-niam aw zet nel aw zetih pehzom-awknak kan rak neih theu mi a tlasam ti ka theisuak ruangro. Ka zung kainak  ahcun zamrangten ka feh. Ka mawtaw sangka hman khar man lo in ka mawtaw ihsin cun ka dawp. Ka zung sungih tlun khan ahcun ka feh cih. Jane in sangka a rak ong ih a hnen ahcun, Jane, sorry tuk, ka nupi thawn then-awk ding hi a cangthei mi a si lo, ka duh sal lo ka ti.

Mangbang zetin in zoh ih ka hmai le ka cal cu in tham. Na khua a sik maw si? in ti. A kut cu ka hlonsak. Sorry Jane, “ka nupi hi ka then lo ding ka ti. Kan neih-awknak/thit-awknak in a kel a awh thei lonak san cu kan hringnun ih thil fate hi mak lo tukih kan rak ret ruangah a si, kan duhawk lo ruangah a si lo. Kan neihawk sun ih kan inn sungih ka cawi lut ni ihsin thokin ka thih hlan tiang amah lawng hi cawi ringring dingin thu ka rak tiam, cucu ka theisuak ding ee” tiah ka ti.  

Jane cu a thinheng tuk ih ka hmai ah na zetin in beng ih ringpin a tap. Keicun hnuai lam ah ka fehsan ih ka mawtaw kha zamrang zetin ka mawng. Lamzin ah ka nupi hrang ding pangpar ka lei. Pangpar zuartu nute cun a lengah ziangtin ka ngan ding in ti. Ka hni ih , “thihnak in in then hlan sung cu nangmah lawng hi ka lo cawi ringring ding” tin ngan aw ka ti.

Cuih zan cu inn ah tuanten ka tlung. Rose par cu ka kut ah ka keng phah, mithmai pan le hni siamsi te thawn ka nupi hmu dingin tlun khan ahcun ka fehcih.   

Ka nupi kha cancer natnak a rak veinak thla khat lai a rak ti zo, Jane thuhla ih ka rak buai tuk ruangah a na ti khal a rak thei lo. Tui hnu thla khat ah a thi mai ding ti a si, cui thu cu a thei ko. Anih cun a thih hnu khal ah kan fate hi run zoh tha dingin in dil. Ka thinlung a thleng aw ti a rak thei lo. Asinan ka fapa ih mithmuh ahcun ‘pa duh um tak ka rak si ringring’.

Zir theimi: Nupa karlak le pehzom awknak timi ahhin thil fate le mak lemlo ih ka ruah theu mi pawl hi an rak thupi sawn theu a si. Lennak, sumlepai, thil le ri a rak si lo. Lungawinak cangtertu an si, a dik. Asinan anmah te cun lungawinak timi an pe thei lo. Curuangah na koppi hrangih rualpi si thei dingin caan pe aw, cun pehzom-awknak a ti hngettertu thil fate kha a hrangah tuahsak zuam aw. Cuti asile a nuam mi thit-umnak le hringnun nan nei thei ding a si. 

Source: Novel Stories- E Book