A
Pu ih Cabuai Ah
Putar pakhat hi a fapa tei inn ah um
dingin a feh. A fapa cu innsang thawn ummi a si; a nupi le a fapa kum 4 mi
thawn an um. Putar pa hi a tar zet
thlang ruangah a ummen khalle a kut cu amah ten a thia theu, a mit khal a caw
thlang, tha ten khal a feh thei nawn lo. An inn sungsang zate in cabuai pakhat
ah rawl an ei tlang. Putar pa cu a kut a thia ciamco tlang tikah rawl kha
thitha in amah ten a ei thei nanw lo. Tihang le buhfang kha zial lak ah a tlakter
hlei ah khengkho tla a ti kuai theu.
A fapa le a fapa ih nupi cun an hmuh
tikah an duk a dul theh. An rawl ei kam a thawn nawn lo. Kan putar hrangah thil
pakhat khat ka tuah a tul tiah innsang pabik cun a ti. Cabuai fate an tuahsak.
Midang cu cubuai pakhat ah nuam zetin an ei nan, amah lawng cabuai fate pakhat
ah an eiter. An putar in kheng pahnih a ti kuai ruangah thing thawi tuahmi
kheng ah rawl an ei ter. Putar pa cu amah tei rawl a ei tinten a mitthli a fawr
ringring. Asinan tong lo ten daiten rawl cu a ei. Cumi pawl cu nauhak kum 4 mi
cun a rak zoh thup theu.
Zan khat cu an fapa kha tapthlang ah thing
thawi tuahmi kheng thawn a lek rero. A pa in, ka fapa ‘ziang na tuah rero’ tiah
a sut. An fapa cun ramrang zetin, ‘nan tar tikih nan einak ding kheng nangmah le
ka nu hrangah ka tuah rero tiah a let. A tong cun a nulepa ih thinlung a khawng
zet ih tong ngaihnak an thei nawn lo. Zianghman tong lo in, an mitthli a fawr
cih. Ziang an tuah ding ti an theifiang thlang.
Cuih zan cu pabik in a pa (putar pa) cu
a hruai ih an einak cabuai ah rawl a eiter ve. A nunsung cu an hnenah rawl a ei
sal. Tucun putar pa in ten-um zet ih rawl a ei caan ah siseh an khengkho a
titlak caan khal ah siseh zianghman an poisa nawn lo.
Zir theimi: Nauhak pawl hi thil hminsin
lam ah an cak zet. An mit in thil an zoh ringring, an hna hin thil an ngai
ringring, an thinlung ih an theihmi thu hi tuah tengteng an duh.
Inn sungsang ah a nuam mi le a mawi mi
mizia kan hmang asile an nun sung cuih mizia cu an cawng/thlun ding. Curuagnah
a fimmi nulepa cun fale hrangih cawn/ zohhim dingmi nulepa kan si ti an thei, fale
pawl hmailam an nun dang ding a hram buntu kan si ti an thei. Curuangah A fimmi
hram buntu le zohthimtlak si zuam cio uh si. Ziangahtile nauhak pawl cu kan
hmailam can neitu, kan ruahsanmi an si. Hringnun timi hi midang thawn pehzom
awknak a si. Na duhdawtmi siseh, nangmah le nangmah khal kilkhawi tha ringring
fawn aw.
Source: Moral Stories
No comments:
Post a Comment