Nupi/Pasal Hril Thu
Tlawngta pakhat in, “ziangruangah milai hi an duhmi hnakin midang pi an thit/nei theu?” tiah a sayapa thu a sut. A sayapa
cun, “na thusut mi simfiang ding cun loram ah va feh aw la, lo sungih sangphut/sangvut
kung tha bik va la aw, cun ra sal aw” a ti. Asinan na theih ding mi dan le dun cu
hitin a si “vei khat lawng na zoh thei, na fehsan zo hnuhnu cu dunglet hawi in na va zohsal
thei nawn lo” a ti. Tlawngta pa cu loram ah feh in sangphut kung cu a va zoh,
tlar hmaisa bik a zoh tikah kung tha zet pakhat a hmu, a duh zet, asinan hi
hnakin tha a um pangah tiin a laan. Kung tha zet pakhat a hmu lala, asinan hi
hnakin tha deuh a um pangah tiin a fehsan lala.
Loram a hrek deuh thaw a fang theh hnu
cun hmaisa bik ih a hmuh mi kha a tha bik ti a theisuak. A tha deuh a hawlnak
ah a tha bik kha a la ngah lo ti a thei aw thlang. A tha bikmi a rak zohliam
men ruangah amah le mah a thiam aw lo zet, a thinheng tukih a sayapa hnen ahcun
kutlawng in a va feh. A sayapa cun “a
tha sawn mi na hawlnak ah a tha bikmi na caan, na ngah lo ti na theihsuak tik ahcun na tlai
zo ih na feh thei nawn fawn lo” tiah a rak ti. Hivek in si minung in an duhdawt zet
mi an congah lo dan cu!’ tiah a rak ti bet.
Tlangta pa cun, “cuti asile, duhmi kan
nei lo ding tinak maw si tiin a sut bet. Sayapa in si lo ve. Zo khal in
an duh zawng an ton ahcun an duh thei ko. Asinan, mi pakhat na duh taktak a si
ahcun, ziangtik hman ah va tlansan hrimhrim hlah’ tiah a ti.
Tlawngta pa in, “ziangruangah an duhmi co
ngah lo in midang pi an nei” tiah a sut sal. Sayapa cun, “na thusuh mi phi ding
cun, vainim cinnak hmun ah feh aw la, vainim kung tha bik kha rak keng aw” tiah
a ti. Asinan dan le dun cu a hlan vek thotho in a si. Voi khat lawng na zoh
thei, na tlansan hnuhnu na zoh sal thei nawn lo” tiah a ti. Vainim cinnak hmun
ahcun a feh. Tucu ti sual nawn lo dingin le a tha bik hril ngah dingin a
ralring zet. Vainim cinnak hmun ih a laifang a thlen tikah kung tha zet pakhat
a hmu, a phoi ih diriam zetin a sayapa hnenah a feh cih. A sayapa in, “tucu kut
lawng in na ra tlung nawn lo. A tha zetmi pakhat na hmu, cumi cu ka hrangah a
tha bikmi a si ding timi zumnak thawn na phoi cih. Hivek ciah sokhaw milai in
nupi/pasal kan hril” tiah a ti.
Tlawngta pa cu thinlung buai zetin a
ding ringring. A sayapa cun, “ziangmi na ruat rero lai?” tiah a sut. Tlawngtapa
cun, “na duh zet mi thit maw, na thit mi duh ha tha sawn ding, khuimi si tha sawn
ding timi ka ruatbuai” tiah a sim. A sayapa cun, “Himi cu simfiang a awl zet, tuihlan
ih ka lo sim vekin an si, a dik a si ti na pom duh le duh lo si mai” tiah a ti.
Zir
theimi: Hringnun hi kheng sungih retmi thingthei rah vek a
si. Na harhdamnak dingah himi kheng sungih retmi hi diriam tak le lungkim takin na ei mai ding maw asilole hmun dang ih ummi thingthei ei dingin na hril sawn ding ha! Fimkhur
zet ih na hrilthiam a tul. Cuti lo asile na nunsung sir-aw in na um ding. Na
hringnun ah dik zet le felfai zet ih na um a si ahcun hivek duhhrilnak ahcun na ti sual zik lo.
Source: Novel Story : Ee Books
No comments:
Post a Comment