Pathian Thu Kaihhngetnak Part 8 (a peh)

B. Thuthangṭha Cabu Simfiang Dan Ding

Thuhmaihruai                                                   

                                     

    Zumtu Khristian hrang ahcun Jesuh Khrih hi kan zumnak hrampi le sungmuril a si. Hi leitlun a rak len laiah mangbangza thil tampi a rak tuah ih kumkhua nunnak thu khal a rak sim (Johan 6:68). Asinan thil pakhat a rak sim dah lomi a um, cucu a thuanthu hi a si. Cuti asile ziangtin saw a thuhla le a thuanthu kan theihthei ding? Bible sung hmun dangdang ihsin Jesuh Khrih timi hi a um ngaingai a si ti kan thei ko nan, Thuthangṭha cabu pali: Matthai, Mark, Luke le Johan hi Khrih ih thuanthu felfai le cipciar takih in simfiangtu an si. Himi Thuthangṭha pali pawl ih cungcuangnak le thupitnak cu Pathian fapa, Jesuh Khrih ih thuanthu pawl in simtu an sinak hi a si.                                                                                               

 Himi bungṭhen sungih na theih ṭul zetmi le na zir ṭul zetmi thupi pahnih cu: A  pakhatnak ah Thuthangṭha cabu pawl hi ziang an si ti a si. Cipciar deuh ih kan sim asile, Thuthang Ṭha ngantu pawl in ziangvek thuanthu pawl an ngan tum? An thuanthu nganmi pawl hi tuisan thuanthu vek an si maw? Si ti bang sehla, ziangah kan theih duh zetmi a thuanthu dang, tahṭhimnak ah kum hleihnih a ti lai hrawng ih a tuahmi thil pawl tla kimcang ten an ngan lo? Cun Thuthangṭha pali pawl in Khrih thuanthu hi ziangruangah a sangsang ten an ngankhum ṭheh lo ti paw hi kan zoh dingmi a si. Thuthangṭha cabu pawl theihthiam ding cun an ngan dan phun (genre) hi a cang thei tawk ih kan theih a ṭul a si bik ko.                                                                                  Himi thupi pawl kan theihngah cun thupi dang “ziangtin Thuthangṭha cabu kan simfiang ding” timi thupi ah kan feh thei thlang. Thuthangṭha cabu pawl ih sim duhmi hi thei suak in dik zetih nunpi thei dan ding lamzin a um maw? Lamzin a um a si, a sangsang ten kan vun zoh vivo hnik pei. A hmaisa ah kan thupi hmaisa sawn a simi Thuthangṭha cacu pawl hi ziang an si (khat lam ih kan rel asile Thuthangṭha ngan dan phun) timi thupi thawn kan thok ding.                                                                                                                  

Thuthangṭha Hi Ziang An Si?                                                                                            

           Thukam Thar cabu pawl ngan hlan deuhte ah Thuthangṭha timi ṭongfang hin ram khelnak lam ih hmanmi ṭongfang a rak khihhmuh (Tahṭhimnak ah, Ram khat le ram khat asilole party khat le khat an doawk tikih nehnak a cotu pawl ih an hman ṭheumi ṭongkam). Asinan Thukam Thar ahcun Thuthangṭha timi ṭongfang hin Jesuh Khrih ih phuanmi Thuthangṭha (Marka 1:14-15) le Amah Khrih ih thuanthu (1Korin 15:1, 3-4) a khihhmuh/ a sawh duh a si.

Curuangah Thuthangṭha cabu pawl hi khat lamah thuanthu  an si ve. Zo khalin thuanthu hi siar kan paih in an duh cio. Ziangruangah hi tluk lawmam in thuanthu hin kan thinlung le kan ruahnak in luahkhat/ in ciahneh? A san cu thuanthu kan siar le kan ngai tikah cui thuanthu sung ahcun kanmah kan telve asilole thuanthu hin kan nunnak in pehtlai vekih kan ruahawk ruangah a si. Thuanthu um dan kha kan mithlam in a phunphun in kan rak suai ih hivek zawngin thuanthu sung ahcun kan tel ve. Thuthangṭha cabu pawl hi cu thuanthu ngai nuam men lawng si loin, hmuar nei zetmi le huhman nei zetmi an si. Cuti asile ziangvek thuanthu saw an si cuang?

Thuthangṭha cabu na siar tikah tulai san thuanthu menmen thawn an bangawk lo zia na hmu ding. Jesui’ thuanthu hi tulai thuanthu ngan dan vekin famkin zetin a thok in a cem tiang an ngankhum ṭheh lo. A suahkehnak ihsin misenpi hnenih a hna ṭuannak ah an kat cih mai a si. Matthai le Luka in Jesui’ suahkehnak an ngan nan, Marka cun a ngan ve lo. Marka in Khrih thu a ngan tikah Jordan tiva ih baptisma a laknak le sualforh a tonnak  in a ngan thok mai(Marka 1:9).

Cu a tlangpi thu in Thuthangṭha ngantu pawl in Jesui’ tuahmi pawl hi a sangsang ih cangsuak mi vek cekci in si lo in, thupi pakhat hnu pakhat hril in an rem khawm sawn a si. Jesui ih simmi thu pawl khal phun dangdang in an ngankhum. Thuthangṭha cabu le santhar thuan ih dan-awknak pakhat kan hmuh thei hrih mi cu Jesu ih netabik caan hmannak hi a hi. Tahṭhimnak ah, Johan in bung 12nak ihsin thokin Jesu ih netabik a caan hman dan cu cipciar thei bikin a sim, sipciar takin anih tluk ih simfiangtu hi an um zik lo.                                                                     Thuthangṭha cabu pawl hi santhar thuanthu thawn an dang-aw kan ti tikah, thuanthu an si lo kan tinak a si lo. Santhar thuanthu an si lo kan ti duhnak a si sawn. Cun hlanlai thuanthu ngantu khalin ngan dan phun an rak nei. Khuahlan thuanthu cun thu tlangpi a nei ve; thuanthu cangtu ih suahkehnak, a tuahmi le a thih dan. (Thuanthu ngantu pawl in thuanthu cangtu ih thih dan, ziangruangah asilole ziangtin a thi timi hi an ti thupiter, ziangahtile mi pakhat ih thih dan hin a thuanthu tampi a rel a si.) Thuanthu ngantu in thuanthu cangtu ih suahkehnak le thihnak thu karlak ah thuhla tampi a hril hrimmi a ngan, a cuih thuhla pawl cu amah cangantu in a remkhawm.  Thuthangṭha cabu pali pawl na siar tikah cangantu pawl ih thuanthu ngan dan le hlanlai thuanthu ngantu pawl ih ngan dan hi bangawknak tampi an nei ti na thei ding.

            Thuthangṭha cabu pawl na siar tikah, Jesui’ thu an sim fingfing na’n, pakhat le pakaht ih sim dan le ngankhum dan an bangawk lo zia na hmufiang ding. Khrih thuhla phun dangdang ih a ngan khumtu cabu pali kan nei tinak a si ko. Curuangah Khrih thuhla hi a sangsang ih cangsuak mi le ngankhum mi santhuanthu vekih na siar tum asile buainak tampi a lo thlen ding. Tahṭhimnak ah Matthai le Luke in Jesuh Hniksaknak thu an ngan veve na’n, an ret dan/ an ngankhum dan a bang aw lo. Annih pathum kan zohnak san cu Khrih ih thuhla kha hmunkhat ih a hmutu Thuthangṭha pathum (Synoptic Gospel) an si ruangah a si (Johan in Jesui thu a ngan dan cu a vung dang zet). A hnuai ih zuk suaimi ah Thuthangṭha ngantu pathum, Matthai, Marka le Luka pawl in Jesui thu an sim fingfing nain, an retkhawm dan a bangawk lo zia na hmu ding.

Thil cangmi	Matthai	Marka	Luka
Jesuh in miphar a damter	8:1-4	1:40-45	5:12-16
Rom Ralbawi ih hnen-um a damter	8:5-13	A um lo	7:1-10
Peter ih pizon a damter	8:14-15	1:29-31	4:38-39
Mina tampi a damter	8: 16-17	1:32-34	4:40-41
Jesuh Thluntu ding pawl	8: 18-22	A um lo	9:57-62
Jesuh in thlipi a daiter	8:23-27	4: 35-41	8:22-25
Khuavang plohmi pahnih a damter	8:28-34	5:1-20	8:26-39
Jesuh in mizengpa a damter	9:1-8	2: 1-12	5:17-26
Jesuh in Matthai a ko	9:9-13	2:13-17	5:27-32
Rawl ulhnak thu	9:14-17	2:18-22	5:33-39
Jesuh puan a thamtu nunau nu a dam	9:18-26	5:21-43	8:40- 56

Thuanthu an ret khawm dan lawng si loin, ṭongfang an hman dan khal a bang aw lo a si. Tahṭhminnak ah, Matthai 5:3 ahcun “Thlarau lamah ka farah ti a thei awtu pawl cu mi thluasuak an si” tin a um. Asinan Luka 6:20 ahcun “Mi farah pawl cu mi thlawsuak nan si” ti lawngin a um. Cun Jesuh thu ṭhennak hmun an thlenpi ṭum ih Jesu le Puithaim Saang biakawknak khal ah ṭongfang an hman dan hi a bang aw lo a si.

            Matthai 26:63-64 ahcun hitin a um:                                                                                        Cule Puithiam Saang cu a hung ṭong sal ih, “A nungmi Pathian hmin saal in siatcam in ka lo ti: Pathian fapa Messiah na si maw si lo so, sim hnik” tiah a ti. Jesuh in, “ nangmah in na sim zo! Asinain thungai in ka lo sim: tuih thokin Milai Fapa hi Ziangkimtithei ih vorhlam ah to in nan hmu pei ih vancung mero par ihsin a rat khal na hmu ding,” tiah a ti.

            Mark 14:61-62 ahcun hitin a um:                                                                                       

 Cule Puithiam Saang cun, “Sunloih mi Pathian ih Fapa Messiah cu na si maw?” tiah a sut sal. Jesuh in, Ka si! Milai Fapa hi Ziangkimtithei ih vorhlam kapah to in vancung mero thawn a rat khal nan hmu leh ding,” tiah a ti. 

            Luka 22: 67-70 ahcun hitin a um:                                                                                            Annih in, “Messiah na si maw? In simhnik!” tiah an sut. Jesuh in, “Ka lo sim hmanah in zum lo ding. Cule thu ka lo sut khalle in let fawn lo ding. Sikhalsehla atu thokin Milai Fapa cu Cungnungbik Pathian ih vorhlam kapah toter a si ding,” tiah a ti. An zate in, “Cuti asile Pathian Fapa maw na si?” tiah a ti. Anih in, “Ka si kha nanmah in nan sim!” tiah a let. 

Thuthangṭha cabu sungih kan neihmi Jesui’ thuanthu pawl hi Thuthangṭha ngantu pali in Jesui’ dung thlun tahrat in aw khumnak le video cemara vek thawn an ngahsuak mi a si lo ti cu kan fiang ko ding (Thuthang latu vekin aw khumnak le video cemara thawn Jesui tuahmi le simmi hi khum hai sehla, an ngankhum dan a bangaw cekci ding sisi.) Cuti asile ziangtin kan tuah ding? Thuthangṭha ngantu pawl in (thuthang latu le thuanthu ngantu pawl in thuthang ummi hmauhhmauh an sim ṭheh cawk lo bangin)Jesui’ thuanthu hi a zaten an ngan/sim cawk lo ti hi kan theihfiang dingah a thupi. Apostle Johan in “Jesuh ih a tuahmi thil dang tampi a um hrih. Pakhat hnu pakhat ngan vivo sehla nganmi cabu pawl cu leitlun pumpi hmanah hin a tlem cawk lo ding tiah ka ruat” tiah a ti (Johan 21:25). Jesui’ simmi le tuahmi thil pawl hi ngan ṭheh ding cun culai ah cabu (scroll) in a rak daih lo a si. A rahsuak cu, Thuthangṭha ngantu pawlin Thlarau Thianghlim ih kaihhruainak hnuaiah (Bible san cakuat a rak siartu pawl hnenah hmualnei zet ih Thuthangṭha an sim theinak dingah) ziangmi thuhla kan telh ding ih ziangtin kan remkhawm ding timi hi fingkhur zetin an hril a si.

Khuahlan thuanthu ngantu vekin, Thuthang Ṭha ngantu pawl in Jesui tuahmi le simmi an ngankhum tikah an cabu nganmi ih tumtah le hmuitin mi ih zirin (a sangsang ten si kherkher loin) thil cang mi kha an duh dan in ngan theinak covo an nei a si.Luka Thuthangṭha cabu ih thuhmaihruai ih kan hmuh thei mi cu Luka in Jesui’ thuanthu a ngansal/simsal tikah Jesuh Khrih ih a zirhmi le a tuahmi kha a hmutu le a theitu pawl hnen ihisn felfai zet ih zingzoi ṭheh ta a si zia khal a simfiang (Luka 1:1-4). Thuthangṭha cabu pawl ih hmuitinmi hi Bible san cakuat a rak siartu pawl dinhmun thawn kaih-aw in Jesuh an zum theinak dingah Khrih thu kha dik zet le rinum zet ih an hnen ih sim hi a si. Curuangah Thuthangṭha cabu kan siar tikih a bangaw lo mi ṭongfang le thuhla tete pawl hi a sualmi vekin si loin, cangantu in an ngan duhmi ih zirin an hril hrim mi le an renkhawm mi a si sawn ti hi kan theih dingah a thupi.                                                                                                   Tu ah Thuthangṭha cabu pawl le khuahlan thuanthu cu an sinak le pian dan phun ah an bangawk zia kan thei hngah. Asinan Thuthangṭha cabu kan siar tikih kan theih ṭul zetmi pakhat cu Thuthangṭha kan timi pawl hi santhuanthu ngan khummi menmen an si lo, Khrih ih thuanthu a si tihi a si. Cangantu pawl in Khrih ih thuanthu hi in simsal, santhuanthu an ngankhum men mi a si lo. Cakuat a rak siartu pawl in Khrih ih hnaṭuannak le nunnak ihsin zir dingah Khrih ih thuanthu hi in simsal a si. Cangantu pawl in cakuat a rak siartu pawl hnenah Bible ih thu dik/thu tak sim dingah Khrih thuanthu kha hril hrim in an rem khawm a si. Santhuanthu simnak hin tumtah mi an nei cia ding, asinan Mathai, Marka, Luka le Johan ih tumtah mi cu Khrih hi a si.             

 Thuthang Ṭha ngantu pawlin Jesui’ thuhla an ngan tikah an thinlung sungih hmuitin mi an neihmi pahnih cu : (1) Cangantu pawl in Khrih ih thuanthu sim dingah a thuanthu pawl kha ralring zet le fumfe zet in an hril khawm ih an rem khawm, (2) Khrih ih thu an ngannak ihsin Bible san minung pawl hnenah siseh, tui san minung pawl hnenah siseh thil thupi zet an sim. Thlarau Thianghlim in hiti zawngih Thuthangṭha ngantu pawl kha a kaihruai ruangah, a siar dan ding lamzin khal a mil-aw ih kan tuah a ṭul.

Thuthangṭha Cabu Siar Dan Ding                                                                                                 Thuthangtha cabu kan siar dan hi Pathian in cangantu pawl a rak thawkkhum dan thawn mil-aw ih kan siar theinak dingah karbak pahnih kan suakpi. Cuih pawl cu: (1) Kan siarmi thuanthu bur tete pawl in Jesui’thu kha ziangtin in sim? (2) Cangantu in thuanthu bur tete pawl komkhawm/finkhawm phah in Bible san cakuat a rak siartu/pawl hnenah ziang a sim tum?                                                                                   

Thuanthu Bur 1nak	Thuanthu Bur 2nak	Thuanthu Bur 3nak
Hi tawk ih thuanthu tawi hin ziangmi in sim tum?	Hi tawk ih thuanthu tawi hin ziangmi in sim tum?	Hi tawk ih thuanthu tawi hin zianmi in sim tum?

Thuanthu Bur 1,2 le 3

Thuanthu tawi tete pawl khawlkhawm/ ngan khawm phah in cangantu in cakuat a rak siartu pawl hnenah ziangmi a sim tum?

Tahṭhimnak ah Luka 10:38-42 sungih Mary le Martha thu hi kan zoh hnih pei. Karbak pakhatnak ahcun na siarmi thuanthu tawi in Khrih thu kha ziangtin an sim ti a si kha.      

Luka 10:25-37	Luka 10:38-42	Luka 11:1-13
	Hitawi ih kan hmuhsuak mi zirhnak cu Pathian hrangih thil ṭha kan tuahnak hin Amah Pathian pawlkom man lo dingin in tuah thei. Martha in Jesuh hrang ih ei in a timlam ruangah thil ṭha bik a tuah ngah lo a si: Jesuh ih thusimmi a ngai ngah lo a si.

            Na feh hla hlan ah na siarmi Bible bungcang kiangkap, dung le hmai ih ummi thuanthu tawi dang kha tuah sin hnik aw. Luka 10:25-37 le 11:1-13 kha siar ta aw, cun nangmah ten thusuhnak tuah aw, himi thuanthu ih sim duhmi ziang a si? Himi thuanthu in Jesuh thu ziangtin in sim? Himi thuanthu sungih Jesuh ih tuahmi le simmi ihsin ziangmi kan zir ve ding? Thuanthu pakhat hnu pakhat fingkhawm phah in ziangmi thu in sim tum? A hnuai ah Luka ih nganmi thuanthu bur tete pawl ihsin zirnak hrampi kan hmunsuak ve mi cu:

Luka 10:25-37	Luka 10:38-42	Luka 11:1-13
Mi pakhat in innhnen hrang duhdawtnak a neihmi hi zovek minung, zovek miphun, ziangvek biaknak  asilole zovek milian le mi farah par khalih langter ding a si.	Pathian hrangih thil ṭha kan tuahnak hin Amah Pathian pawlkom man lo dingin in tuah thei. Martha in Jesuh hrang ih ei in a timlam ruangah thil ṭha bik a tuah ngah lo a si: Jesuh ih thusimmi a ngai ngah lo a si.	Hi tawk ah Jesuh in thlacamnak thawn ziangtin Pathian kan pekzom ding timi in zirh a si (11:1-4). Himi hi thlacamnak thu ih tahṭhimnak in a thluncih (11:5-8), cun thlacam dingih forhfialnak kan hmu cih fawn (11:9-13).

           

Karbak pakhatnak ahkhan thuanthu bur tin in Jesui’ simmi le thil tuahmi kha ziangtin in sim timi a si kha . Karbak pahnihnak ahcun thuanthu bur tete pawl remkhawm phah in cangantu in ziangmi thu a sim tum timi a si. Curuangah karbak pahnihnak ahcun Mary le Martha thuanthu le a kiangkap ih ummi thuanthu bur kha hmun khat ah ret khawm in Luka in cakuat a rak siartu pawl hnenah ziangmi a sim tum himi kan hawlsuak a ṭul. Curuangah a tlun ih thufingkhawmnak kan tuahmi hi zoh phah in  a bangaw zetmi thupi an neih tlangmi ziang a si ti ruat aw. An pehzom awknak asilole an pehtlai awknak na hmu maw?     

Thuanthu Bur 1,2 le 3
Thuanthu tawi tete pawl khawlkhawm/ ngan khawm phah in cangantu in cakuat a rak siartu pawl hnenah ziangmi a sim tum?

Himi thuanthu bur pathum in hmunkhat te ih an neih tlangpi thutlang cu pehzom-awknak a si ko lo maw! A hmaisabik thuanthu bur ah “Khrih dung thluntu pawl cu bawmtu le tuamhlawm ṭul mi hrangah duhdawtnak a neimi innhnen ṭha an si ding a si” tiah in zirh. A pahnihnak thuanthu bur sungah cun “biaknak lam hnaṭuannak asilole cangvaihnak ai-in Jesuh ih simmi thu ngai hi a thupi bik ih ret a ṭul a si tiah in zirh. A neta bik ah Luka in Pathian thawn kan pehzom-awknak thu kha thupi zetin a sim. Khrih thluntu pawl cun ziangtin an innhnen an pehzom ding ti an theih a ṭul (rawlbawlnak), an Bawipa an pehzom dan ding an theih a ṭul (Hlan-awknak), Pa Pathian an pehzom dan ding an theih a ṭul (Thlacamnak).

Hitawk ah Luka ih sim duhmi hi zateek ah za kan dik ṭheh tiah kan sim thei lo, midang (siartu dang) in hitei pathum ih neihtlang mi thutlangpi hi phun dang zawngin an hmu men thei. Asinan himi thuanthu bur pathum kom ih an neih tlangmi thutlangpi na hawl tikah himi thuanthu bur pathum ko ihsin na hmuhsuak mi a si tengteng a ṭul.                                      

  Tutiang ah Thuthang tha cabu pawl na siar tikih na theih tulmi karbak pahnih asilole na suh tulmi thupi pahnih zohnak kan nei zo. Thuanthu bur tete ah ziangmi thu a um ti kan zoh hmaisa ih Thuanthu sau sim dingah Thuanthu bur tete pawl kha ziangtin a rem khawm ti kan zoh bet.  Tu ahcun thuanthu pawl hi ziangtin bulbak zawngin asilole a hlawm a hlawm in kan siar ding timi thupi zohnak kan nei ding.

1. Bulpak Thuanthu Siar Dan Ding

Bulpak thuanthu sungih Pathian ih simduhmi/ zirhduh mi hmusuak thei dingah kan theih ṭulmi thupi pawl zohnak kan nei ding. Marka 4:35-41 ih ummi ‘Jesuh In Thlipi Hrang A Daihter” timi thu hi tahṭhimnak ah hmangin zoh ṭulmi pawl pakhat hnu pakhat kan tarlang ding.

Cuih sun zanlam ah Jesuh in a dungthluntu pawl cu, “Tili ih khatlam ralah va feh uh si,” tiah a ti. Curuangah misenpi pawl cu an taan ih dungthluntu pawl cu lawng sungah an lut. Cuih lawng sungah Jesuh cu a rak to zo ih lawng cun an fehpi. Cunah lawng dang pawl tla an um. Rinlopi ah thlipi nasa zetin a hrang ih tilet tho cu lawng sungah a lut vivo ih lawng sungah cun tidai a khat zik thlang. Jesuh cu lawng ih mei lamah a um ih tokham parah a rak itthat. Dungthluntu pawl cun an ṭhang ih, “Sayapa, kan hlohral thluh ding hi na poisa lo maw si?” tiah an ti.                                                                                                                                                            Jesuh cu a hung tho ih thlipi cu, “Hrang nawn hlah!” tiah thu a pek ih tilet cu, “Dai aw!” tiah a ti. Cutikah thli cu hrang nawn loin a um ih tilet khal a dai khepkhep. Jesuh in a dungthluntu pawl hnenah, “Ziangah so cuti lawmmam ih nan ṭih? Zumnak nan nei hrih lo maw si?” tiah a ti.                                                                                                                                               Cumi cu a mak tuk an ti ih an mang bangin pakhat le pakhat, “Hi pawl hi zo bik so a si pei? Thlipi le tilet hman in a thu an ngai hi!” tiah an ti aw rero (Marka 4:35-41).

a. Thuanthu maimai na siar tikih thu na suh dan vekin sut aw: Zo a/an si? Ziangmi thu a si?          Ziangtikah? Khoitawkah? Ziangruangah? Ziangtin?

Zo pawl an si? (an sinak)	- Jesuh (cang 35, 36, 38, 39, 40, 41) - Dungthluntu pawl (cang 35, 36, 38, 40, 41) - Mipi (cang 36)
Ziangmi thu an si? (a sung um thutlangpi)	- Tipi an kaan rero laiah thlipi nasa zetin a hrang, tilet a tho ruangah an lawng sungah tidai a khat zik thlang (cang 37) - Dung thluntu pawlin lawng ih mei lamah, tokham parih a rak itthat tu Jesuh cu an ṭhang (cang 38) - Jesuh in thlipi cu dai dingin thu a pek (cang 39) - Jesun in a dungthluntu pawl zumnak an neih lo ruangah a kawk (cang 40) - Tipi le tilet tlun ih Jesui’ thuneihnak an hmuh tikah an mang a bang (cang 41)
Ziangtikah? (caan)	- Zaanlam a kim tikah Jesuh le a dungthluntu pawl cu tili kaan dingin an feh (cang 35) - Thlipi a hrang rero laiah Jesuh cu a rak itthat, a dungthluntu pawl cu hlohral ding phang in an um (cang 38) - Jesuh in thlipi hrang nawn hlah a ti tikah thli a hrang nawn lo, tilet khal a dai khepkhep (cang 39) - Thlipi le tilet an daih tikah a dung thlung pawl cu an mang a bang (cang 41)
Khoitawkah (a hmun)	- Jesuh le a dungthluntu pawl cu tili ih khatlam ralah feh an tum (cang 35) - Lawng sungah an um (cang 36) - Lawng sungah tidai a khat zik thlang (cang 37) - Jesuh cu lawng ih mei lamah a um ih a rak itthat (cang 38)
Ziangruangah (a san)	-Dungthluntu pawlin Jesuh cu thinheng phah in an ṭhang, ziangahtile an hlohral thluh ding kha a poisa lo ah an ruat (cang 38) - Jesuh ih thupeknak ruangah thliri le tilet cu an dai khepkhep (cang 39) - Dungthluntu pawl cu an mang a bang, ziangahtile thlipi le tilet hmanin a thu an ngai (cang 41)
Ziangtin? (an hmanmi thil)	- Dungthluntu pawlin thusuhnak hmangin Jesuh mawhthluk an tum (cang 38) - Jesuh in a ṭongkam hmangin thlipi a daiter (cang 39) - Jesuh in thusuhnak hmangin a dungthluntu pawl a mawhthluk (cang 40) - Dungthluntu pawlin Jesuh ih huham thil ti theinak an ṭihzia kha thusuhnak hmangin an relsuak: “Hipa hi zo bik so a si?” (cang 41)

                                                                                               A tlun ih thusuhnak pawl in thuanthu sungih umpi thil thupi zetzet in hmuhsuak tertu an si. Cun himi thuanthu ahcun Jesuh le a dungthluntu pawl lawng an tel tikah himi thuanthu hin Jesuh le a dungthluntu ih pehzom-awknak thu a sim ti cu a fiang mai. Jesuh in a dungthluntu pawl ziangmi a zirh tum si pei? Ziangmi zirhnak an hmusuak ding? Jesuh in thlipi a daihternak le a dungthlun pawl ih thusuhmi ihsin kan hmuh theimi cu zumnak le thihnak (thlaphannak) a si. A dungthluntu pawl cu tidai sungah lawng thawn pil ding ṭih le thlaphang ih an um rero lai ah Jesuh cu hnangamte in a rak ihthat ziar a si. Jesui’ ṭong suakmi khal kha kan hngilh lo a si. Cun thlipi le tilet hman hi a thu neihnak hnui ih ummi an si. Hitawk sungih thusuhnak pawl hi siar an nuam ngaingai. A dungthlunpawl in Jesuh daite ih a rak um mennak thu an sut tikah Jesuh cun zumnak an neih lonak thu a rak sut sawng (cang 40). Jesuh ih thusuhnak in a dungthluntu pawl ih thinlung ah thusuhnak a suahter (a maksak zia thu sut sal dingah): “Hi pa hi zo bik so a si? Thlipi le tilet hmanin a thu an ngai hi!” 

b. Thuanthu sungih nolhsal mi ṭongfang pawl kha ṭhaten hminsinak tuah aw.                                      

  Thuanthu nganmi pawl hin voi tampi cu an sim duhmi/zirh duhmi thu theihter dingah an ṭongkam hman mi kha an nolh sal cingcing. Thuthangṭha sungih thuanthu pawl pakhat hnu pakhat na siar tikah nolhsal mi ṭongfang pawl hi na zohṭhat an ṭul taktak a si. Tahṭhimnak ah, Johan bung 15 na siar asile “sungah um uh” timi ṭongfang hi atu le tu cangantu in a nolh sal cingcing kha na hmu ding. Cun Matthai 23:13-28 na siar asile “nan hmakhua a va pit so!” timi ṭongfang, Jesuh in Daanthiam pawl le Farasi pawl hnenah siatralnak an tong ding ruangih ralrin a peknak ṭongkam nolh-aw rero kha na hmu ding. Cun Matthai bung 5 sungih Jesuh ih thusimnak ah “hlanlaiah cun …..tiih an simmi cu nan thei, asinan Keicu” timi ṭongfang nolhsal rero a si kha na hmu ding. Himi hi Jesuh ih thuzirhnak  danglam tertu khal a si.                                                       

 Thuthangṭha ngantu in an tumtahmi theihter dingah a nolhsal mi ṭongfang hi an hmang hrim ṭheu a si. Himi pawl hi daithlang pang hlah, thei lo vekin um pang hlah! Luka 12:22-34 ah ziangmi ṭongfang pawl nolhsal in a um? Na hmuh asile vun rin san aw?

Cuih hnuah Jesuh in dungthluntu pawl hnenah, “cu a si ruangah nan ei dingmi rawl hrangah siseh, nan sinfen ding hnipuan hrangah siseh, dohhar in um hlah uh, tiah ka lo sim. Ziangahtile nunaak cu rawl hnakin a thupi sawn ih taksapum cu hnipuan hnakin a thupi sawn a si. Tlangak khi zohhnik uh; annih in thlaici an tuh lo ih rawl khal an khawm fawn lo. Rawl-inn le cuam khal an nei lo. Asinain Pathian in  a cawm hai. Nannih tla cu vate hnakin a let tampi in nan sunglawi sawn a si. Nanmah lakah zotal in ei-in le sinfen thu a hlehkamnak in a nunnak malte a sauter theitu nan um maw?

Cutluk thil fate hman nan tuah thei lo a si acun ziangah so thil dangdang thu cu nan helhkam duh rero? Hramlak pangpar tla khi ziangvekin an ṭhang ti zohhnik uh: Hna an ṭuan lo, sinfen an zaal fawn lo. Sikhalsehla thungai in ka lo sim: Siangpahrang Solomon in hi pangpar pakhat ih mawinak hi a thluk lo. Tuihsun ah a um na’n thaisun ahcun a um nawn lomi, meisa sungih paih-mi hramlak hrampi hman khi a thuamtu cu Pathian a si. Nanih tla cu a lo thuam sinsin lo ding maw si? Nan zumnak a mal tuk lawmmam!                                                               “Ei ding le in ding thu lawng ruat le helhkam ringringin um hlah uh. Ziangahtile leitlun tlunih khawvel mipawl in cubangtuk thil cu an ruah ringringmi a si. Nan Pa in hi bangtuk thil nan ṭul ti cu a thei. Curuangah nan Pa ih Uknak kha helhkam in hawl sawn uhla thil dang pawl cu a lo pe leh ding,” tiah a ti (Luka 12:22-31). 

c. Cangantu in thuhla a rak simfiang cia dan pawl kha zoh aw.        
                                                         

Voi tampi cu Thuthangṭha ngantu pawlin ziang an sim tum ti langter dingah theihternak (clue) kha thuanthu an nganmi ih hramthoknak ah thuhla rak ngan ciami an nei ṭheu. Tahṭhimnak ah, Luka in Luka 14:7 ah hitin a ngan, “Rawl zawhnak hmunah mi ṭhenkhat pawl in tonak ṭha bik an hril ṭheu kha Jesuh in a hmu ruangah hi tahṭhimnak hi an zate hnenah a sim.” Hitawk ih tahṭhimnak hi na siar hlan hman in “Jesuh in hngalnak thu asilole dangdornak thu” a sim tum a bang ti zumhmang in na sim thei mai.                                                                                                                                                    

Matthai bung 5 sungih Tlangpar Thuzirhnak ih hramthoknak tla hi hitin a si, “Jesuh in mipi a hmuh tikah thlangpar ah a hung kai, cutawkah cun a to ih a dungthluntu pawl a hnenah an ra. Cule a kam a kau ih hiti in thu a zirh thok.” A hramthoknak ih kan hmuh theimi cu Tlangpar Thuzirhnak hi dungthluntu pawl hnen ah si loin, miseenpi hnen sawn ah a si. Ziangahtile ‘A dungthluntu pawl khal a hnenah an ra’ tiah Matthai in a ti.                                                                                                                          

 Cun voi tampi cu Thuthangṭha ngantu in ziang an sim duh ti langter dingah theihternak (clue) kha a netnak ah an ret ṭheu. Marka 4:35-41 sungih ‘Jesuh in thlipi hrang a daihter thu’ ah cangantu in hitin thuanthu a tawpter, “Hi pa hi ziangvek minung so a si? Thlipi le tipi hmanin a thu an lun hi!” tiah an tiaw. Hitawk ah Marka in cakuat rak siartu pawl hnenih a sim duhmi cu Jesuh hi saya pa tiih nan kawhmi “Rabbi” hnak ih cungcuang deuhmi milai pakhat a si zia theihter ding kha a si. Thlipi le tilet daihter theinak huham (Pathian mizia le sinak dik) neitu a si zia hinah cangantu in a langter a si.                                                                                                                                       

  Matthai 19:16-30 sungih Jesu le Milian Tlangvalpa biakawknak thu ah Matthai in himi thuanthu cemnetnak ah hitin a ti, “Sikhalsehla a tuih hmaisa bik a si mi pawl hi neta bik an si leh ding; atuih neta bik a si mi pawl hi hmaisa bik an si ding,” tiah a ti. Hitawk ah Jesuh in leitlun ropitknak le liannak kha tlunlam tanglam (upside- down) ah a linglet ter ṭheh. Jesui’ dungthluntu si ruangih ziangkim sungral ṭhehtu pawl hi riahsia ding an si lo, vancung uknak ramah a hmaisa bik an si leh ding a si.

            A can ahcun cangantu in thuanthu ih sim duhmi fianternak ah catluan an bet ṭheu. Marka 7:1-23 sungah, “Minung Baaltertu Thil” thu ah Farasi le Daanthiam pawl in Jesuh thusuhnak an nei. Marka in 7:19 ah hitin thu a bet, “Hitiin Jesuh ih a sim tikah ziang bangtuk rawl hman hi ei thiang an si ṭheh ko, tiah a ti duhnak a si.”                                                                          Tahṭhimnak dang Johan 20:1-10 hi vun zoh bet sehla; Peter le Johan  Jesui’ thlaan lawng ih an feh ṭum ah Peter a feh hmaisa a si kha (cang 6). Bible in cule a dungthluntu dang (Johan) khal thlaan sungah cun a lut ve ih a hmu ih a zum tiah a ti (cang 8). Cun Bible in a sim betmi cu “Thihnak ihsin a thosal ding tiih Ca Thianghlim in a timi kha a tican an theithiam hrih lo (cang 9)” ti a si. Himi catluan ngan betmi hin a fiangter emem mi cu “dungthluntu Johan ih zumnak hi Ca Thiangthlim (Thukam Hlun) siarnak ah si lo in, thlaan lawng le Jesuh a tho sal taktak ti kha a mit rori ih a hmuhnak in a si, Johan cun a hmu ih a zum!                                                                                  Thuthangṭha cabu ih sim duhmi pawl hi cangantu in fiangternak hrangih a rak ret ciami theihternak (clue) zohnak thawn kan hmusuak thei mai a si. Hivek rak ngancia mi thutlang hi thuhram thoknak asilole cemnetnak ah an hmu ṭheu ding. A can ahcun cangantu in catluan betnak thawn an fiangter ṭheu fawn.

d. Thuanthu maimai ihsin thuhla sau sim-awknak hmun kha zoh tha aw.

Thuhla sau simawknak hmun timi ahcun thusimtu hi an ṭong ding. Asinan an simmi hi midang ih sim sawng mi (quotation mark) vekin a lang ding. Thuanthu na siar tikah midang tong vek cekci ih tong salnak pawl hi a dangte ih na ret asile thuanthu ih sungmuril, tumtahmi kha na theithiam cih mai ding. Mark 4:35 sungih Marka ih nolhsal mi (Jesui’ ṭongmi pawl) tla hi a dangten ret hnik aw, thuanthu ih sungmuril asilole zirhduhmi na thei cih ding:

Cang 35: “Tili khatlam ralah va feh uh si,”                                                                              

  Cang 38: “Sayapa, kan hlohral thluh ding hi na poisa lo maw si?”                                                     

 Cang 39: “Hrang nawn hlah!”                                                                                                            

  Cang 40: “Ziangahso cuti lawmmam ih nan ṭih? Zumnak nan nei hrih lo maw si?”                                 

 Cang 41: “Hi pa hi zo bik so a si pei? Thlipi le tilet hmanin a thu an ngai hi!

Mark bung 4 ih Jesuh ih zirh duhmi thuhrampi cu a hnuailam vekin a si:

Jesuh in a huham cahnak kha tipi parah a langter ih harsat mangbang lai caan ah Pa Pathian ring phah in zumnak thawn a rak sawnkir.

Thinlung sungih tahṭhimnak dang runglang mi Jesui’ Hmuihmel Thlengnak thu ih Pathian aw kan theihnak hi a si: Hihi ka duhdawt zet mi ka Fapa a si, a parah ka lung a awi zet. A thu ngaithla uh,” tiah a ti (Mat 17:4). Jesu in a thih ding thu a sim tikah, a dung thlungtu pawl hin an theithiam lo ih an buai rero, asinan hiti vekih Pathian aw an theih tikah an hrangah sullam tampi a neih a zum um a si.                                                                                                                                       

 Cule a can ahcun kan siar mi Bible bungcang hi pakhat le pakhat biakawknak hlir in a khat ding. Tahṭhimnak ah, John 4:4-26 ah Jesuh le Samaria nunau biakawknak kan hmu. Judah mi le Samaria nunau bia aw timi hi a mak ngaingai, mangbangza a si. Ziangahtile cang 9 ih kan hmuh vekin Judah mi pawl hi Samaria miphun thawn an kom aw dah lo. An bia aw dah lemlo. Asinan an biakawknak sungih um mi thuhla pawl zohnakin Johan in cakuat a raksiartu pawl hnenah ziangmi a zirh duh ti cu na thei mai ding kan zum. A tlangpi thu in thuhla sau simawknak le biakawknak timi hin thuanthu ih zirh duhmi thuhrampi hmusuak dingin sangka in on sak a si.

Thuthangṭha cabu sungih bulpak thuanthu asilole a hlawm a hlawm/ a bur a bur ih ummi thuanthu sungih Bible ih zirh duhmi thuhrampi kan hawl tikah thuanthu menmen kan siar tikih thusuhnak kan tuah vek khan thusuhnak kan tuah tengteng a ṭul, nolh salmi ṭongfang le thuhla pawl zohṭhat a ṭul, cangantu ih rak simfiang cia dan le khat le khat biakawknak pawl kha kan zoh ṭhat a ṭul. Tucun thuanthu bur tete pawl/ bulpak thuanthu ih pehzom awk dan pawl zohnak kan nei thlang ding.

Peh leh ding 👉👉👉